قامت الدني وقَعَدت ليش قالو عنن شهدا…. شي قال هودي ضحايا… وشي كان كافر لدرجة إنّو قال هودي كفار….
آيه…. كفار….. كفرو عالبغض… والحرب…والحقد…والارهاب…..
واستسلموا لفرح الحياة…ولحب الحياة….ولجنون الحياة يللي للأسف ما ستاهلو يطولو فيا….
الكفار هني مَش بس يللي بيقتلو الجسد…. الكفار هني كمان يللي بجربو يقتلو الروح…. ويللي ما بيحترمو الموت….. ويللي سلاحن هوي بس لسانن المجوي من ورا دماغ مغسول بافكار دينية ما بتعرف من الدين اللا الادانة….
مينكن انتو تتحكمو عالناس؟ ومينكن انتو تتقولو هيدي خطية؟ ومينكن انتو تتقررو مصير الناس؟ وهل ربنا حطكن وكلا عنو ونحنا ما معنا خبر؟
ريتا، هيكل والياس انغدرو وانقتلو وهني مبسوطين ومتأملين إنّو اذا بللشت السنة بفرح… بتكون كللا خير….. ما كانو عارفين إنّو وقت هنني حجزو ticket عتركيا…. كان في ناس عّم بيخططو تيقتلون مفكرين حالن امنو ال ticket عالجنة…… بس ما رح ينفتحلن اللا أبواب الجحيم على مصراعيها……
يا ريت يحللو عنا كل يللي حاملين الدين تا يحمو حالن ويجربو يخبو وسخن بكلام الأنبياء ……
الدين منو سلاح اللا ضد الشيطان….. الدين منو للإدانة…
نعم…… ريتا وهيكل والياس شهدا…. لأنو كانو عمبحاربو الاٍرهاب  والبغض … بالحب والفرح….. هالحب يللي انذكر بالإنجيل أكتر من 300 مرة…..
نعم… ريتا وهيكل والياس ابطال…. لانن تحدو الخوف من الاٍرهاب وغامرو وسافرو تيحتفلو بالحياة … وقت كتير منا ما منسترجي نضهر بلبنان… بركي علقنا بالعجقة….
و نعم… و 1000 نعم…. الياس ورديني شهيد وبطل كمان…… اي شهيد…. لأنو الياس مات تيخلص روح إنسان تاني….
الانجيل بيقول….. “لَيْسَ لأَحَدٍ حُبٌّ أَعْظَمُ مِنْ هذَا: أَنْ يَضَعَ أَحَدٌ نَفْسَهُ لأَجْلِ أَحِبَّائِهِ.” يوحنا ١٥/١٣
هيدا الرجال يللي بكل معنى الكلمة قتل حالو كرمالا لمليسا…. وقديش في ناس بيقولو نيالك يا ملليسا ويا كل مين كان عندو حظ يعرف الياس ورديني…. هيك رجال من يللي صارو كتير قلال… يللي هني رجال بكل معنى الكلمة….
قديش في نسوان قتلوها رجالا بيقولو من السما نيالك يا مليسا…. قديش في نسوان خانوها رجالها باكتر من طريقة… بيقولو الله يرحمك يا ألياس ورديني…
لا يا ميرنا ورديني…. البطل ما بيموت….. خيك أبدا ما رح يموت…. خيك عيش…. وخيك رجع عيش الصورة الحلوة عن الرجال اللبناني البطل …يللي هيك نحنا منحبا تضل…..الرجال يللي بيحمي المرأة حتى بروحو…
ريتا يللي كنتي متشوقة للسما…
هيكل يا عريس السما…
والياس يا بطل السما….
فلتكن ذكركم مؤبدة…..

ROZ